Luang Prabang DMN Semi-Annual Meeting in 2023
ກອງປະຊຸມເຄືອຂ່າຍ DMN ແຂວງຫຼວງພະບາງ ປະຈຳກາງປີ 2023.
ວັນອັງຄານ ທີ 11 ກໍລະກົດ 2023 ທີ່ຜ່ານມາ, ທີ່ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງຫຼວງພະບາງ ຮ່ວມກັບກະຊວງ ຖວທ ໄດ້ຈັດກອງປະຊຸມເຄືອຂ່າຍ DMN ແຂວງຫຼວງພະບາງ ປະຈຳກາງປີ 2023 ຂຶ້ນທີ່ພະແນກ ຖວທ ແຂວງ, ໂດຍການສະໜັບສະໜູນຂອງໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອະນຸພາກພື້ນແມ່ນໍ້າຂອງ ໄລຍະ 2 (ຄພສທ 2), ທະນາຄານພັດທະນາອາຊີ (Asian Developmemt Bank – ADB).
ກອງປະຊຸມໄດ້ດຳເນີນໂດຍການເປັນປະທານຂອງ ທ່ານ ນາງ ພອນມະລີ ອິນທະພົມ, ຫົວໜ້າຄະນະບໍລິຫານງານເຄືອຂ່າຍ DMN ຂັ້ນສູນກາງ, ຫົວໜ້າກົມພັດທະນາການທ່ອງທ່ຽວ, ກະຊວງ ຖວທ ແລະ ທັງເປັນຜູ້ຈັດການໂຄງການ ຄພສທ 2 ແລະ ທ່ານ ປອ ນາງ ສຸດາພອນ ຄົມທະວົງ, ຫົວໜ້າຄະນະບໍລິຫານງານເຄືອຂ່າຍ DMN ແຂວງຫຼວງພະບາງ, ຫົວໜ້າພະແນກ ຖວທ ແຂວງຫຼວງພະບາງ ແລະ ທັງເປັນຫົວໜ້າໂຄງການ ຄພສທ 2 ແຂວງຫຼວງພະບາງ.
ຜູ້ເຂົ້າຮ່ວມປະກອບມີ ຄະນະຮັບຜິດຊອບໂຄງການ ຄພສທ 2 ຂັ້ນສູນກາງ ແລະ ຂັ້ນແຂວງ, ຄະນະພະແນກ ແລະ ວິຊາການຈາກກົມພັດທະນາການທ່ອງທ່ຽວ, ຄະນະບໍລິຫານ, ສະມາຊິກ ແລະ ກອງເລຂາເຄືອຂ່າຍ DMN ແຂວງຫຼວງພະບາງ, ພາກລັດ, ພາກທຸລະກິດ, ໂຄງການ ແລະ ອົງການຈັດຕັ້ງສາກົນໃນຂະແໜງການທ່ອງທ່ຽວ.
ກອງປະຊຸມໄດ້ທົບທວນຄວາມໜ້າການຈັດຕັ້ງປະຕິບັດແຜນກິດຈະກຳຂອງເຄືອຂ່າຍ DMN ແຂວງຫຼວງພະບາງ ພ້ອມທັງຮັບຟັງການນຳສະເໜີຂອງ ທ່ານ ທອງ ຄູນ ໄຊຍະລາດ, ຜູ້ຈັດການບໍລິຫານທຸລະກິດ, ບໍລິສັດທ່ອງທ່ຽວຄຣີນແອັດແວນເຈີ (Green Adventure / Green Discovery) ກ່ຽວກັບແຜນການຈັດງານແລ່ນວິບາກຫຼວງພະບາງ (Luang Prabang Ultra Trail) ວັນທີ 21 – 22 ຕຸລາ 2023 ແລະ ທ່ານ ວິໄລທອງ ເຮືອງໂພໄຊ, ຮອງຫົວໜ້າຂະແໜງໂຄສະນາການທ່ອງທ່ຽວ, ພະແນກ ຖວທ ແຂວງ ກ່ຽວກັບຮູບແບບງານຖະແຫຼງຂ່າວປີທ່ອງທ່ຽວລາວ 2024 ແລະ ງານຫຼວງພະບາງງາມແທ້ໂອ 2024 ເຊິ່ງສາມາດສັງລວມໄດ້ດັ່ງນີ້:
ແຄມເປນລາວທ່ຽວລາວ
1) ໂຄງການ SUSTOUR ໄດ້ໝົດສັນຍາກັບບໍລິສັດ RDK ໃນທ້າຍເດືອນມິຖຸນາ 2023, ແຄມເປນລາວທ່ຽວລາວ ສາມາດເຂົ້າເຖິງນັກທ່ອງທ່ຽວຈຳນວນ 4 ແສນຄົນ. ບໍລິສັດໄດ້ຈັກຝຶກອົບຮົມໃຫ້ທີມງານຂອງ ສຄອຊ ໃນການນຳໃຊ້ ແລະ ບໍລິຫານຄຸ້ມຄອງສື່ສັງຄົມອອນລາຍ. ສຄອຊ ກຳລັງຊອກຫາແຫຼ່ງທຶນໃໝ່.
ຈັດງານເທສະການ ແລະ ກິດຈະກຳສົ່ງເສີມການທ່ອງທ່ຽວ
ກຳລັງກະກຽມ
1) ງານແລ່ນວິບາກຫຼວງພະບາງ (Luang Prabang Trail), 21 – 22 ຕຸລາ 2023
- ຈັດໂດຍ ບໍລິສັດທ່ອງທ່ຽວຄຣີນແອັດແວນເຈີ, ຄາດວ່າຈະມີນັກແລ່ນຈຳນວນ 1,000 ຄົນ, ຖ້າບວກຄົນມານຳແມ່ນ ຄູນ x 2 – 3. ໄລຍະທາງແລ່ນມີ 8 Km, 18 Km, 30 Km, 55 Km, 104 Km.
- ຮູບແບບການຮ່ວມມືກັບພາກທຸລະກິດ: 1) ບໍລິສັດຄຣີນແອັດແວນເຈີ ຈະສ້າງແພັກເກັດທົວ 3 ລະດັບ ຄື: Budget: 39 USD, Medium: 40 – 60 USD and Premium: 100 USD+. ລາຄາແມ່ນລວມ ຄ່າເດີນທາງໄປກັບຫຼວງພະບາງ, ທີ່ພັກ, ຄ່າລົງທະບຽນງານແລ່ນ ແລະ ລົດຮັບສົ່ງໄປບ່ອນແລ່ນ. ກິດຈະກຳອື່ນໆແມ່ນນັກແລ່ນສາມາດເລືອກຊື້ເພີ່ມເຕີມເຊັ່ນ ອາຫານ, ກິດຈະກຳ ແລະ ສະຖານທີ່ທ່ອງທ່ຽວ ແລະ ອື່ນໆ, 2) ຈັດສະຖານທີ່ວາງສະແດງຂອງພາກທຸລະກິດ ເພື່ອຂາຍລາຍການທ່ອງທ່ຽວ, ສາມາດຈັດໃນມື້ໃຫ້ຂໍ້ມູນນັກແລ່ນ ເຊິ່ງຈະຈັດກ່ອນງານໜຶ່ງມື້ ແລະ ມື້ງານ, ມີພິທິກອນ, ມີກິດຈະກຳຖາມຕອບ, ແຈກລາງວັນເຊັ່ນຄູປອງສ່ວນຫຼຸດການບໍລິການ ແລະ ອື່ນໆ, 3) ທຸລະກິດໃຫ້ສ່ວນຫຼຸດນັກແລ່ນທີ່ສະແດງບັດເຂົ້າຮ່ວມງານ ໂດຍບໍ່ຈຳເປັນຕ້ອງຮ່ວມຂາຍແພັກເກັດ.
- ບາດກ້າວໃນຕໍ່ໜ້າ: ສະເໜີໃຫ້ບໍລິສັດບໍລິສັດຄຣີນແອັດແວນເຈີ ສືບຕໍ່ປະສານງານກັບ ສະມາຄົມທຸລະກິດທ່ອງທ່ຽວ ແລະ ສະມາຄົມໂຮງແຮມ ແລະ ຮ້ານອາຫານແຂວງຫຼວງພະບາງ ໃນການສ້າງແພັກເກັດທ່ອງທ່ຽວ, ຈັດກິດຈະກຳວາງສະແດງກ່ອນ ແລະ ໄລຍະງານ ແລະ ການໃຫ້ສ່ວນຫຼຸດນັກແລ່ນ.
2) ງານຫຼວງພະບາງງາມແທ້ໂອ 2024, ໄລຍະເດືອນພະຈິກ – ທັນວາ 2023, 2 ວັນ
- ພ້ອມທັງຈັດງານຖະແຫຼງຂ່າວປີທ່ອງທ່ຽວລາວ 2024, ຍັງລໍຖ້າມື້ຈັດງານຖະແຫຼງຂ່າວຂອງສູນກາງ
- ງານມີ 4 ເນື້ອໃນ: 1) ງານຖະແຫຼງຂ່າວ, 2) ງານວາງສະແດງ, 3) ການພົບປະ B2B & B2C ແລະ 4) ການຈັດລາຍການສ່ວນຫຼດ (Promotion).
- ງານຖະແຫຼງຂ່າວ: ສະເໜີກິດຈະກຳປີທ່ອງທ່ຽວລາວ 2024, ເຊີນນັກຂ່າວ ແລະ ຜູ້ມີຊື່ສຽງ (influencers) ຈາກພາຍໃນ ແລະ ຕ່າງປະເທດ.
- ງານວາງສະແດງ: ຕີມ (theme) ຫຼື ຄອນເຊັບຂອງງານແມ່ນກ່ຽວກັບເຂົ້າ. ຜະລິດຕະພັນທ້ອງຖິ່ນທີ່ເຮັດຈາກເຂົ້າ, ຂັ້ນຕອນການຜະລິດເຂົ້າ ແລະ ອື່ນໆ. ມີຫ້ອງວາງສະແດງຂອງຫົວໜ່ວຍທຸລະກິດທ່ອງທ່ຽວເຊັ່ນ ສາຍການບິນ, ບໍລິສັດທ່ອງທ່ຽວ, ທີ່ພັກແຮມ, ຮ້ານອາຫານ, ຂົນສົ່ງ ແລະ ທຸລະກິດອື່ນໆເຊັ່ນ ລາວໂທລະຄົມ, ທະນາຄານ ແລະ ອື່ນໆ.
- ງານພົບປະ B2B and B2C: ສະມາຄົມທຸລະກິດທ່ອງທ່ຽວແຂວງຫຼວງພະບາງ ເປັນພາກສ່ວນຮັບຜິດຊອບ.
- ການຈັດລາຍການສ່ວນຫຼຸດ: ຈະນຳໃຊ້ບັດດຽວໄດ້ສ່ວນຫຼຸດໝົດປີ, ສະມາຄົມໂຮງແຮມ, ເຮືອນພັກ, ຮ້ານອາຫານ, ຮ້ານບັນເທິງ-ຄາຣາໂອເກະ, ຮ້ານນວດ ແລະ ສະປາແຂວງຫຼວງພະບາງເປັນພາກສ່ວນຮັບຜິດຊອບ.
- ໂຄງການ ຄພສທ 2 ຂັ້ນສູນກາງກຳລັງເຮັດວຽກຮ່ວມກັບກົມໂຄສະນາການທ່ອງທ່ຽວ ໃນການວ່າຈ້າງບໍລິສັດ RDK ເພື່ອສ້າງ marketing campaign ເພື່ອໂຄສະນາການທ່ອງທ່ຽວລາວ. ໃນນັ້ນ, ແມ່ນມີກິດຈະກຳເຊື້ອເຊີນຜູ້ມີຊື່ສຽງຈາກຕ່າງ ປະເທດ ເຊິ່ງກໍເປັນເປົ້າໝາຍຂອງງານຫຼວງພະບາງງາມແທ້ໂອ 2024, ສາມາດເຮັດຮ່ວມກັນໄດ້. ສູນກາງຈະແຈ້ງລາຍລະອຽດ ແລະ ຄວາມຄືບໜ້າໃຫ້ແຂວງຊາບ ພາຍຫຼັງກອງປະຊຸມຜ່ານຮ່າງ marketing campaign ວັນທີ 21 ກໍລະກົດ 2023 ນີ້.
ເຂົ້າຮ່ວມງານວາງສະແດງທ່ອງທ່ຽວ
ກຳລັງກະກຽມ
- ITE HCMC, ໂຮ່ຈີມິນ, 07 – 09 ກັນຍາ 2023
- CITIE, ກວາງໂຈ, ສປ ຈີນ, 15 – 17 ກັນຍາ 2023
- ITB Asia Singapore, 25 – 27 ຕຸລາ 2023
- WTM London, 06 – 08 ພະຈິກ 2023
- ATF, ມັງກອນ 2024: ສະເໜີໃຫ້ພາກທຸລະກິດປຶກສາຫາລືກັນກ່ຽວກັບຄວາມສົນໃຈໃນການເຂົ້າຮ່ວມງານ ແລ້ວສະເໜີຕໍ່ພະແນກ ຖວທ ແຂວງຫຼວງພະບາງ.
- ITB Berlin, ມີນາ 2024: ໂຄງການ SUSTOUR ຈະສະໜັບສະໜູນທຸລະກິດທີ່ໄດ້ຮັບການຢັ້ງຢືນຈາກ Travelife.
ຈັດງານ FAM Trip ສຳລັບສື່ມວນຊົນໃນເຂດພາກພື້ນ, ຄົນມີຊື່ສຽງ, ບໍລິສັດທ່ອງທ່ຽວໃນເຂດພາກພື້ນ ແລະ ສາກົນ
- ໂຄງການ SUSTOUR ຈະຈັດລະຫວ່າງວັນທີ 25 ກັນຍາ – 01 ຕຸລາ 2023, ລົງທະບຽນແລ້ວ 108 ບໍລິສັດທ່ອງທ່ຽວ, ຈະຄັດເອົາແຕ່ 20. ສື່ມວນຊົນຈະເລືອກເອົາ 10 ຄົນ.
ພັດທະນາການທ່ອງທ່ຽວແບບປະຊາຊົນມີສ່ວນຮ່ວມ (Community Based Tourism – CBT)
- ບ້ານເປົ້າໝາຍຂອງໂຄງການ ຄພສທ 2: ບ້ານຊ່າງໄຫ, ບ້ານຊ່າງຄ້ອງ, ບ້ານທ່າແປ້ນ, ບ້ານຈ່ານເໜືອ, ບ້ານຊຽງລ້ອມ, ບ້ານລ່ອງເລົາ, The Living Land, ນາເຂົ້າໜຽວຟາມສະເຕ ແລະ ນາເຂົ້າຫ້ອມ.
- ໂຄງການ SUSTOUR ໄດ້ຈັດຝຶກອົບໃຫ້ເກົ້າບໍລິສັດ ໃນການເຮັດວຽກກັບຊຸມຊົນ, ໄດ້ເຊັນສັນຍາກັບບ້ານຊ່າງຄ້ອງ ແລະ ບ້ານຈ່ານເໜືອ.
ການປົກປັກຮັກສາສິ່ງແວດລ້ອມ (Environment)
- ໂຄງການ ຄພສທ 2 ສະໜັບສະໜູນການຈັດຕັ້ງປະຕິບັດມາດຕະຖານເມືອງທ່ອງທ່ຽວສະອາດອາຊຽນ ແລະ ມາດຕະຖານໂຮງແຮມຂຽວອາຊຽນ
- ໂຄງການ SUSTOUR ຊ່ວຍ ເຄື່ອງ bio-gas 20 ຈຳນວນເຄື່ອງຢູ່ ຕະຫຼາດກາງຄືນ ແລະ ໂຮງແຮມ, ຝຶກອົບຮົມຜູ້ປະກອບການໃນການແຍກຂີ້ເຫຍື້ອ, ກິດຈະກຳໃຫ້ຍືມຈອກ (Rent your cup), ຈອກກິນໄດ້ (ຈອກເຮັດຈາກເຂົ້າໜົມ)
ຈັດຝຶກອົບຮົມກ່ຽວກັບ Travelife and Lasting Laos
- ຊ່ຽວຊານດ້ານ Travel Life ມາປະຈຳຢູ່ລາວແລ້ວ
- ໄດ້ຈັດຝຶກອົບຮົມການຢັ້ງຢືນ Lasting Laos
- ໄດ້ຈັດຝຶກອົບຮົມການເຂົ້າເຖິງແຫຼ່ງທຶນ
ຈັດຝຶກອົບຮົມດ້ານການບໍລິການ
ສໍາເລັດແລ້ວ
- ຝຶກອົບຮົມດ້ານການບໍລິການອາຫານ ແລະ ເຄື່ອງດື່ມ, ຢູ່ສະຖາບັນລານິດເກົ່າ, ມີທຸລະກິດພາຍໃນນະຄອນຫຼວງພະບາງເຂົ້າຮ່ວມ
- ຝຶກອົບຮົມພະນັກງານນຳທ່ຽວຂັ້ນແຂວງ
ກຳລັງກະກຽມ
- ຝຶກອົບຮົມພະນັກງານນຳທ່ຽວຂັ້ນແຂວງຄັ້ງທີ 3
- ຝຶກອົບຮົມນວດແຜນບູຮານ
- ຝຶກອົບຮົມການບໍລິການແມ່ເຮືອນ
