Champasak DMN Meeting
ກອງປະຊຸມເຄືອຂ່າຍ DMN ແຂວງຈຳປາສັກ
ວັນອັງຄານ ທີ 07 ພະຈິກ 2023 ທີ່ຜ່ານມາ, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງຈຳປາສັກ ຮ່ວມກັບກະຊວງ ຖວທ ໄດ້ຈັດກອງປະຊຸມເຄືອຂ່າຍພັດທະນາ, ສົ່ງເສີມ ແລະ ຄຸ້ມຄອງຈຸດໝາຍປາຍທາງການທ່ອງທ່ຽວ (ເຄືອຂ່າຍ DMN) ແຂວງຈຳປາສັກ ຂຶ້ນທີ່ພະແນກ ຖວທ ແຂວງຈຳປາສັກ, ໂດຍການສະໜັບສະໜູນຂອງໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວອະນຸພາກພື້ນແມ່ນໍ້າຂອງ ໄລຍະ 2 (ຄພສທ 2) Second GMS Tourism Infrastructure for Inclusive Growth Project – TIIGP 2, ກະຊວງ ຖວທ.
ກອງປະຊຸມໄດ້ດຳເນີນ ໂດຍການເປັນປະທານຂອງ ທ່ານ ນາງ ພອນມະລີ ອິນທະພົມ, ຫົວໜ້າຄະນະບໍລິຫານງານເຄືອຂ່າຍ DMN ຂັ້ນສູນກາງ, ຫົວໜ້າກົມພັດທະນາການທ່ອງທ່ຽວ, ກະຊວງ ຖວທ ແລະ ທັງເປັນຜູ້ຈັດການໂຄງການ ຄພສທ 2 ຂັ້ນສູນກາງ ແລະ ທ່ານ ສຸລິນ ເພັດທານີ, ຫົວໜ້າຄະນະບໍລິຫານງານເຄືອຂ່າຍ DMN ແຂວງຈຳປາສັກ, ຮອງຫົວໜ້າພະແນກ ຖວທ ແຂວງຈໍາປາສັກ ແລະ ທັງເປັນຫົວໜ້າໂຄງການ ຄພສທ 2 ແຂວງຈຳປາສັກ.
ມີເຂົ້າຮ່ວມຈາກພາກລັດ ແລະ ພາກທຸລະກິດ ໂດຍສະເພາະແມ່ນຄະນະບໍລິຫານ ແລະ ສະມາຊິກເຄືອຂ່າຍ DMN ແຂວງຈຳປາສັກ, ໂຄງການ ແລະ ອົງການຈັດຕັ້ງສາກົນໃນຂະແໜງການທ່ອງທ່ຽວ, ຄະນະພະແນກ ແລະ ວິຊາການຈາກກົມພັດທະນາການທ່ອງທ່ຽວ, ຄະນະຮັບຜິດຊອບ ແລະ ຊ່ຽວຊານໂຄງການ ຄພສທ 2.
ກອງປະຊຸມໄດ້ທົບທວນຄວາມຄືບໜ້າການຈັດຕັ້ງປະຕິບັດແຜນກິດຈະກຳຂອງເຄືອຂ່າຍ DMN ແຂວງຈຳປາສັກ ປະຈຳປີ 2023 ເຊິ່ງສັງລວມດັ່ງລຸ່ມນີ້:
ຈັດງານເທສະການ ແລະ ກິດຈະກຳສົ່ງເສີມການທ່ອງທ່ຽວ (Tourism Promotion Events)
– ຈັດງານບຸນວັດພູ, ເມືອງຈຳປາສັກ, ເດືອນກຸມພາ
– ຈັດງານບຸນກາເຟ, ນະຄອນປາກເຊ, ເດືອນກຸມພາ
– ຈັດງານແຂ່ງຂັນ Asia Cross Rally 2023, 19 – 21 ສິງຫາ 2023
– ຈັດງານແລ່ນປາກເຊຮາບມາຣາທອນ (Pakse Half Marathon), ນະຄອນປາກເຊ, 24 ກັນຍາ 2023
– ຈັດບຸນຊ່ວງເຮືອ, ນະຄອນປາກເຊ, ເດືອນຕຸລາ
ເຂົ້າຮ່ວມງານວາງສະແດງທ່ອງທ່ຽວ (Travel Trade Fairs)
– ເຂົ້າຮ່ວມງານວາງສະແດງ Made in Laos, ນະຄອນຫຼວງວຽງຈັນ, ເດືອນກຸມພາ
– ເຂົ້າຮ່ວມງານວາງສະແດງທ່ອງທ່ຽວ BITE ຢູ່ ສປ ຈີນ, 16 – 18 ມິຖຸນາ 2023
– ເຂົ້າຮ່ວມງານ B2C Roadshow ຢູ່ຈັງຫວັດອຸດອນ, ປະເທດໄທ, ເດືອນພະຈິກ
– ເຂົ້າຮ່ວມງານພົບປະລະຫວ່າງ ສສ ຫວຽດນາມ, ອຸບົນ ແລະ ແຂວງສະຫວັນນະເຂດ ແລະ ແຂວງຈຳປາສັກ
ມາດຕະຖານການທ່ອງທ່ຽວແບບປະຊາຊົນມີສ່ວນຮ່ວມ ແລະ ເຮືອນພັກແຮມປະຊາຊົນອາຊຽນ (ASEAN Community Based Tourism – CBT and Homestay Standards)
– ບ້ານຫຼັກສີ່ສິບ, ຕາດເຍືອງ, ເມືອງປາກຊ່ອງ: ໄດ້ຮັບລາງວັນມາດຕະຖານ CBT ອາຊຽນໃນປີ 2023. ຈະຊຸກຍູ້ໃຫ້ມີໂຮມສະເຕ, ສ້າງຄວາມເຂັ້ມແຂງ ແລະ ປະກອບອຸປະກອນຈຳນວນໜຶ່ງ
– ບ້ານໜອງຫຼວງ, ເມືອງປາກຊ່ອງ: ໄດ້ຮັບລາງວັນມາດຕະຖານ CBT ອາຊຽນໃນປີ 2017 ແລະ 2023. ມີທ່າແຮງຂະຫຍາຍຈຳນວນໂຮມສະເຕ, ຈະສ້າງຄວາມເຂັ້ມແຂງ ແລະ ປະກອບອຸປະກອນຈຳນວນໜຶ່ງ
– ດອນຊົມ, ເມືອງໂຂງ: ປະເມີນແລ້ວ, ຈະຊຸກຍູ້ໃຫ້ໄດ້ມາດຕະຖານ CBT
– ກຸ່ມບ້ານໜອງຢາເທິງ, ເມືອງປາກຊ່ອງ: ປະເມີນແລ້ວ, ຈະຊຸກຍູ້ໃຫ້ໄດ້ມາດຕະຖານ CBT ເຊື່ອມໂຍງກັບກິດຈະກຳທ່ອງທ່ຽວຂອງ Mystic Mountain Homestay ແລະ ຂະຫຍາຍຈຳນວນໂຮມສະເຕ
ຈັດຝຶກອົບຮົມໃຫ້ແກ່ທຸລະກິດໂຮງແຮມ, ເຮືອນພັກ ແລະ ຮ້ານອາຫານ
– ໄດ້ຈັດຝຶກອົບຮົມຫົວຂໍ້ ການບໍລິການສ່ວນໜ້າ ແລະ ການບໍລິການອາຫານ ແລະ ເຄື່ອງດື່ມ ໃຫ້ທຸລະກິດໂຮງແຮມ, ເຮືອນພັກ ແລະ ຮ້ານອາຫານຢູ່ນະຄອນປາກເຊ, ເມືອງປາກຊ່ອງ ແລະ ເມືອງໂຂງ
ຫຼັງຈາກນັ້ນ, ຜູ້ເຂົ້າຮ່ວມໄດ້ປະກອບຄຳເຫັນເຂົ້າໃນແຜນກິດຈະກຳຂອງເຄືອຂ່າຍ DMN ແຂວງຈຳປາສັກ ປະຈຳປີ 2024 ດັ່ງນີ້:
ຈັດງານເທສະການ ແລະ ກິດຈະກຳສົ່ງເສີມການທ່ອງທ່ຽວ (Tourism Promotion Events)
– ຈັດງານແລ່ນດອນເດດ-ດອນຄອນຮາບມາຣາທອນ (Don Det – Don Khone Half Marathon), ເມືອງໂຂງ, 17 ມີນາ 2024. ບໍລິສັດ Green Discovery Laos / Green Step ຈະຢັ້ງຢືນຄວາມເປັນໄປໄດ້ໃນການຈັດງານຕື່ມ.
– ຈັດງານແລ່ນປາກເຊຮາບມາຣາທອນ (Pakse Half Marathon), ນະຄອນປາກເຊ, 24 ກັນຍາ 2024. ຈັດໂດຍ Green Discovery Laos / Green Step
ເຂົ້າຮ່ວມງານວາງສະແດງທ່ອງທ່ຽວ (Travel Trade Fairs)
– ເຂົ້າຮ່ວມງານວາງສະແດງທ່ອງທ່ຽວອາຊຽນ ATF TRAVEX 2024, ນະຄອນຫຼວງວຽງຈັນ, 22 – 27 ມັງກອນ 2024. ໂຄງການ ຄພສທ 2 ຈະສະໜັນສະໜູນຄ່າເຊົ່າຫ້ອງວາງສະແດງໃຫ້ເຄືອຂ່າຍ DMN ແຂວງຈຳປາສັກ, ພາກທຸລະກິດຊື້ບັດເຂົ້າຮ່ວມງານດ້ວຍຕົນເອງ. ພາກສ່ວນສົນໃຈເຂົ້າຮ່ວມແມ່ນ 1) ບໍລິສັດພັດທະນາແຫຼ່ງທ່ອງທ່ຽວນຳ້ຕົກຕາດເຍືອງ (Tad Gneuang Waterfall น้ำตกตาดเยือง), 2) ບໍລິສັດທ່ອງທ່ຽວ GreenParadiseTravel 3) ສະມາຄົມທຸລະກິດທ່ອງທ່ຽວແຂວງຈຳປາສັກ (Champasak Travel Agent Association) ຈະລະດົມສະມາຊິກເຂົ້າຮ່ວມ.
– ຈັດກອງປະຊຸມປຶກສາຫາລືກ່ຽວກັບການຮ່ວມມື ລະຫວ່າງລາວ, ຫວຽດນາມ, ກຳປູເຈຍ ແລະ ໄທ ໄລຍະງານແລ່ນດອນເດດ-ດອນຄອນຮາບມາຣາທອນ, ເດືອນມີນາ 2024
– ຈັດຂະບວນຄາຣາວານ 3 ແຂວງ 3 ປະເທດ ລະຫວ່າງ ລາວ – ໄທ – ກຳປູເຈຍ
– ເຂົ້າຮ່ວມງານວາງສະແດງທ່ອງທ່ຽວ ITB Berlin, ມີນາ 2024
– ງານ TTM, ໄທ, ມິຖຸນາ 2024
– ງານ ITE HCMC – International Travel Expo Ho Chi Minh City, ກັນຍາ 2024
– ງານ CITIE ທີ່ນະຄອນກວາງໂຈ, ສປ ຈີນ, ກັນຍາ 2024
ມາດຕະຖານໂຮງແຮມຂຽວອາຊຽນ (ASEAN Green Hotel Standard)
– ສະເໜີຮັບລາງວັນໄລຍະກອງປະຊຸມທ່ອງທ່ຽວອາຊຽນ ATF, ວັນທີ 26 ມັງກອນ 2024 ຈຳນວນ 15 ແຫ່ງ, ໃນນັ້ນ 10 ແຫ່ງແມ່ນເຄີຍໄດ້ຮັບລາງວັນແລ້ວແຕ່ໝົດອາຍຸ ແລະ 5 ແຫ່ງ ແມ່ນເປົ້າໝາຍໃໝ່.
ມາດຕະຖານການທ່ອງທ່ຽວແບບປະຊາຊົນມີສ່ວນຮ່ວມ ແລະ ເຮືອນພັກແຮມປະຊາຊົນອາຊຽນ (ASEAN Community Based Tourism – CBT and Homestay Standards)
– ສືບຕໍ່ຊຸກຍູ້ 4 ບ້ານເປົ້າໝາຍດັ່ງນີ້: 1) ບ້ານຫຼັກສີ່ສິບ, ຕາດເຍືອງ, ເມືອງປາກຊ່ອງ, 2) ບ້ານໜອງຫຼວງ, ເມືອງປາກຊ່ອງ, 3) ດອນຊົມ, ເມືອງໂຂງ, 4) ກຸ່ມບ້ານໜອງຢາເທິງ, ເມືອງປາກຊ່ອງ
ຈັດຝຶກອົບຮົມດ້ານການບໍລິການໃຫ້ແກ່ທຸລະກິດໂຮງແຮມ, ເຮືອນພັກ ແລະ ຮ້ານອາຫານ
– ຫົວຂໍ້ຝຶກອໄບຮົມ ການບໍລິການສ່ວນໜ້າ, ແມ່ບ້ານ ຫຼື ການອະນາໄມຫ້ອງພັກ, ການບໍລິການອາຫານ ແລະ ເຄື່ອງດື່ມ, ການປຸງແຕ່ງອາຫານ ແລະ ເຄື່ອງດື່ມ ສຳລັບດອນເດດ ແລະ ປາກເຊ, ການບໍລິຫານແບບມືອາຊີບ ສຳລັບເຈົ້າຂອງທຸລະກິດ ຢູ່ປາກເຊ ແລະ ເມືອງໂຂງ
ດາວໂຫຼດເອກະສານກອງປະຊຸມ: https://bit.ly/49aRzcZ
