ກອງປະຊຸມຜ່ານຮ່າງຂໍ້ຕົກລົງວ່າດ້ວຍການປັບປຸງໂຄງປະກອບຄະນະບໍລິຫານງານເຄືອຂ່າຍ DMN ຂັ້ນສູນກາງ
ວັນທີ 28 ຕຸລາ 2021 ທີ່ຜ່ານມາ, ໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວໄລຍະ 2 (ຄພສທ 2), ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດກອງປະຊຸມຜ່ານຮ່າງຂໍ້ຕົກລົງວ່າດ້ວຍການປັບປຸງໂຄງປະກອບຄະນະບໍລິຫານງານເຄືອຂ່າຍພັດທະນາ, ສົ່ງເສີມ ແລະ ຄຸ້ມຄອງຈຸດຫມາຍປາຍທາງການທ່ອງທ່ຽວຂອງ ສປປ ລາວ (Laos National Destination Management Network – DMN) ຂຶ້ນໃນຮູບແບບເຄິ່ງອອນລາຍ.
ຈຸດປະສົງຂອງກອງປະຊຸມແມ່ນ ເພື່ອຜ່ານຮ່າງຂໍ້ຕົກລົງດັ່ງກ່າວ ແລະ ທົບທວນຄວາມຄືບຫນ້າການຈັດຕັ້ງປະຕິບັດແຜນກິດຈະກຳພາກລັດ ແລະ ພາກທຸລະກິດປະຈຳປີ 2021 ແລະ ແຜນກິດຈະກໍາໄລຍະເດືອນພະຈິກ – ທັນວາ 2021. ມີຜູ້ເຂົ້າຮ່ວມທັງຫມົດ 43 ທ່ານ, ເຊິ່ງປະກອບມີພາກລັດ, ພາກທຸລະກິດ, ໂຄງການ ແລະ ອົງການຈັດຕັ້ງສາກົນໃນຂະແຫນງການທ່ອງທ່ຽວ. ກອງປະຊຸມໄດ້ດຳເນີນພາຍໃຕ້ການເປັນປະທານຂອງທ່ານ ສູນ ມະນີວົງສ໌, ຫົວຫນ້າໂຄງການ ຄພສທ 2, ກະຊວງ ຖວທ.
ສັງລວມຄຳເຫັນ ແລະ ຂໍ້ສະຫລຸບ
ເຄືອຂ່າຍ DMN ຂັ້ນສູນກາງ
- ເຄືອຂ່າຍ DMN ແມ່ນບໍ່ທັບຊ້ອນກັບສະພາສົ່ງເສີມການທ່ອງທ່ຽວ ເນື່ອງຈາກພາລະບົດບາດຕ່າງກັນ, ເຄືອຂ່າຍ DMN ແມ່ນເວທີປຶກສາຫາລືພາກລັດ ແລະ ພາກທຸລະກິດ ເຊິ່ງຄອບຄຸມເອົາຫລາຍວຽກງານໃນຂະແຫນງການທ່ອງທ່ຽວເຊັ່ນ: ການພັດທະນາຜະລິດຕະພັນການທ່ອງທ່ຽວ, ການໂຄສະນາ, ການຄຸ້ມຄອງ ແລະ ການພັດທະນາຊັບພະຍາກອນມະນຸດ. ສ່ວນສະພາສົ່ງເສີມການທ່ອງທ່ຽວ ແມ່ນແນໃສ່ການໂຄສະນາ ແລະ ການຕະຫລາດໂດຍສະເພາະ.
- ຜູ້ເຂົ້າຮ່ວມສ່ວນໃຫຍ່ເຫັນດີຕໍ່ກັບໂຄງປະກອບ ແລະ ພາລະບົດບາດຂອງເຄືອຂ່າຍ, ເຊິ່ງປະກອບມີຄະນະບໍລິຫານ ແລະ ສະມາຊິກທີ່ມີປະສົບການຕົວຈິງ.
- ໂຄງການ ແລະ ອົງການຈັດຕັ້ງສາກົນ ສາມາດນຳໃຊ້ກົນໄກເຄືອຂ່າຍນີ້ ເພື່ອສະຫນອງການສະຫນັບສະຫນູນດ້ານວິຊາການ ແລະ ງົບປະມານ
- ສະເຫນີໃຫ້ມີການສົ່ງເສີມການທ່ອງທ່ຽວຢູ່ພາຍໃນນະຄອນຫລວງວຽງຈັນ ນອກຈາກການສົ່ງເສີມການທ່ອງທ່ຽວຢູ່ຕ່າງແຂວງ
- ສະເຫນີໃຫ້ປັບປຸງການຈັດລຽງລຳດັບຊື່ຂອງສະມາຊິກຄືນໃຫມ່ ແລະ ປ່ຽນຫົວຂໍ້ເປັນ ຂໍ້ຕົກລົງແຕ່ງຕັ້ງ.
- ສະເຫນີໃຫ້ເພີ່ມພາລະບົດບາດຂອງເຄືອຂ່າຍ ໃນການປະສານຫາພາກສ່ວນກ່ຽວຂ້ອງ ຫລື ຂະແຫນງການອື່ນ ເພື່ອໄຂບັນຫາ ແລະ ອຸປະສັກທີ່ຕິດພັນກັບການທ່ອງທ່ຽວ
ແຜນກິດຈະກຳພາກລັດ ແລະ ພາກທຸລະກິດ
ແຕ່ລະພາກສ່ວນໄດ້ລາຍງານຄວາມຄືບຫນ້າການຈັດຕັ້ງປະຕິບັດແຜນກິດຈະກຳ ທັງຫມົດ 10 ກິດຈະກໍາ
ກິດຈະກຳເພີ່ມເຕີມ
- ສ້າງແຜນເປີດປະເທດເພື່ອຕ້ອນຮັບນັກທ່ອງທ່ຽວ
- ກະຊວງ ຖວທ ໄດ້ເຮັດບົດລາຍງານຫາຫ້ອງການສຳນັກງານນາຍົກ ໃນວັນທີ 21 ຕຸລາ 2021 ເພື່ອລາຍງານ ແລະ ຂໍທິດຊີ້ນໍາກ່ຽວກັບການນໍາເຂົ້ານັກທ່ອງທ່ຽວທີ່ໄດ້ຮັບວັກຊີນແລ້ວ ແລະ ການສ້າງແຜນເປີດປະເທດ
- ສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ) ກໍໄດ້ສ້າງແຜນເປີດປະເທດທີ່ລະອຽດແລ້ວ ແລະ ໄດ້ລາຍງານໃຫ້ຫ້ອງການ ສນຍ ແລ້ວເຊັ່ນກັນ
- ສະເຫນີໃຫ້ ສຄອຊ ສົ່ງແຜນດັ່ງກ່າວໃຫ້ ກະຊວງ ຖວທ ເພື່ອທັງສອງພາກສ່ວນຈະໄດ້ເຮັດວຽກຮ່ວມກັນ
- ຄວນມີການກະກຽມບຸກຄະລາກອນ ແລະ ສ້າງລາຍງານທ່ອງທ່ຽວເພື່ອຮອງຮັບການເປີດປະເທດ
- ສ້າງມາດຕະຖານດ້ານສຸຂະພາບ ແລະ ສຸຂະອະນາໄມໃນຂະແຫນງການທ່ອງທ່ຽວ (Laosafe Programme), ສະຫນັບສະຫນູນໂດຍໂຄງການ ລາວ/029 ຮ່ວມກັບ ກະຊວງ ຖວທ ແລະ ສຄອຊ. ກະຊວງສາທາລະນະສຸກຮັບຮອງແລ້ວ, ຈະຈັດງານເປີດໂຕໃນໄວໆນີ້.
- ສະເຫນີເພີ່ມກິດຈະກຳຈັດກອງປະຊຸມປຶກສາຫາລືເພື່ອແກ້ໄຂບັນຫາ ແລະ ປະກົດການຫຍໍ້ທໍ້ກັບຂະແຫນງການອື່ນເຊັ່ນ ບັນຫາມົນລະພິດທາງສຽງຢູ່ເມືອງວັງວຽງ
- ສົ່ງເສີມການທ່ອງທ່ຽວແບບປະຊາຊົນມີສ່ວນຮ່ວມ, ໂດຍກົມພັດທະນາການທ່ອງທ່ຽວ, ສະຫນັບສະຫນູນໂດຍ ອົງການ UNDP
- ປັບປຸງສິ່ງອຳນວຍຄວາມສະດວກພາຍໃນສະຖານທີ່ທ່ອງທ່ຽວຢູ່ເມືອງວັງວຽງ, ໂດຍກົມພັດທະນາການທ່ອງທ່ຽວ, ສະຫນັບສະຫນູນໂດຍອົງການ UNDP
- ສະເຫນີສ້າງແຄມເປນອອນລາຍກ່ຽວກັບການທ່ອງທ່ຽວແບບມີຄວາມສຳນຶກຮັບຜິດຊອບ
- ເກັບກຳຂໍ້ມູນທຸລະກິດໃນຂະແຫນງການທ່ອງທ່ຽວ (Nationwide Tourism Enterprise Survey), ສະຫນັບສະຫນູນໂດຍໂຄງການ ລາວ/029 ຮ່ວມກັບກົມຄຸ້ມຄອງການທ່ອງທ່ຽວ, ຈະຈັດງານເປີດໂຕໃນເດືອນພະຈິກ 2021 ນີ້.
- ສົ່ງເສີມການທ່ອງທ່ຽວແບບປະຊາຊົນມີສ່ວນຮ່ວມຢູ່ເຂດປ່າສະຫງວນ, 9 ແຂວງ, ໂດຍໂຄງການ LLL (Lao PDR Livelihoods and Landscapes), ກະຊວງກະສິກໍາ ແລະ ປ່າໄມ້, ສະຫນັບສະຫນູນໂດຍທະນາຄານໂລກ
- ສ້າງກອງທຶນສົ່ງເສີມ SMEs, ສະຫນັບສະຫນູນໂດຍໂຄງການ LBE, USAID, ຈະເປີດໂຕໃນໄວໆນີ້.
ບາດກ້າວໃນຕໍ່ຫນ້າ
- ກະຊວງ ຖວທ ຈະປັບປຸງຮ່າງຂໍ້ຕົກລົງ ເພື່ອສະເຫນີການນຳກະຊວງຮັບຮອງພາຍໃນເດືອນພະຈິກ 2021
- ກະຊວງ ຖວທ ຈະບັນຈຸຄວາມຄືບຫນ້າ ແລະ ກິດຈະກຳເພີ່ມເຕີມເຂົ້າໃນແຜນກິດຈະກຳພາກລັດ ແລະ ພາກທຸລະກິດປະຈຳປີ 2021 ແລ້ວຈະສົ່ງໃຫ້ທ່ານພາຍຫລັງ
- ກະຊວງ ຖວທ ຈະຈັດກອງປະຊຸມເຄືອຂ່າຍ DMN ຂັ້ນສູນກາງ ໃນໄລຍະເດືອນພະຈິກ – ທັນວາ 2021 ໂດຍການເປັນປະທານຮ່ວມກັນລະຫວ່າງ ກະຊວງ ຖວທ ແລະ ສຄອຊ, ຈຸດປະສົງແມ່ນເພື່ອສ້າງແຜນກິດຈະກຳຂອງເຄືອຂ່າຍ DMN ສຳລັບປີ 2022
ວີດີໂອບັນທຶກໄລຍະປະຊຸມ
