ນັບຕັ້ງແຕ່ປີ 2020 ເປັນຕົ້ນມາ, ການແຜ່ລະບາດຂອງພະຍາດໂຄວິດ-19 ໄດ້ສົ່ງຜົນກະທົບອັນໃຫຍ່ຫຼວງຕໍ່ອຸດສາຫະກໍາການທ່ອງທ່ຽວລາວ ແລະ ທົ່ວໂລກ; ການປິດດ່ານສາກົນເຂົ້າ-ອອກປະເທດ ເຮັດໃຫ້ນັກທ່ອງທ່ຽວບໍ່ສາມາດເດີນທາງໄປທ່ອງທ່ຽວ ຜົນກະທົບດັ່ງກ່າວອາດຈະແກ່ຍາວໄປໃນໄລຍະໜຶ່ງ ແລະ ຍັງບໍ່ທັນມີປະເທດໃດສາມາດຄາດຄະເນວ່າ ຈະມີການເປີດປະເທດຄືນໃໝ່. ສໍາລັບປະເທດລາວກໍ່ໄດ້ປິດປະເທດເຊັ່ນດຽວກັນ ນັບແຕ່ທ້າຍເດືອນມີນາ 2020 ເຮັດໃຫ້ຂະແໜງການທ່ອງທ່ຽວລາວຢຸດສະຫງັດລົງ. ເຖິງແມ່ນວ່າການທ່ອງທ່ຽວພາຍໃນປະເທດມີການຟື້ນຟູຄືນດ້ວຍບັນຍາກາດທີ່ດີແລ້ວກໍຕາມ, ແຕ່ການໃຊ້ຈ່າຍຂອງນັກທ່ອງທ່ຽວພາຍໃນເຫັນວ່າຍັງບໍ່ທັນສູງ ຖ້າທຽບໃສ່ການໃຊ້ຈ່າຍຂອງນັກທ່ອງທ່ຽວສາກົນ.
ໃນເດືອນທັນວາ 2021, ຫ້ອງວ່າການສຳນັກງານນາຍົກລັດຖະມົນຕີ ໄດ້ປະກາດໂຄງການເຂດທ່ອງທ່ຽວສີຂຽວ ເພື່ອເປີດປະຕູສູ່ໂລກພາຍນອກ ແລະ ຕ້ອນຮັບນັກທ່ອງທ່ຽວມາທ່ຽວປະເທດລາວ. ແຜນການດັ່ງກ່າວອະນຸຍາດໃຫ້ນັກທ່ອງທ່ຽວເດີນທາງເຂົ້າປະເທດເປັນໝູ່ຄະນະ ໂດຍຜ່ານການບໍລິການຂອງບໍລິສັດທ່ອງທ່ຽວ ແລະ ປະຕິບັດຕາມມາດຕະການຂອງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ເພື່ອຈໍາກັດຄວາມສ່ຽງໃນການຕິດເຊື້ອຕໍ່ກັບປະຊາຊົນໃນທ້ອງຖິ່ນ ແລະ ຕໍ່ນັກທ່ອງທ່ຽວ. ສຳລັບນັກທ່ອງທ່ຽວ ທີ່ເດີນທາງມາແບບລາຍບຸກຄົນ ຍັງບໍ່ທັນໄດ້ຮັບອະນຸຍາດໃຫ້ມີການເດີນທາງເຂົ້າມາ ສປປ ລາວ ເທື່ອ ເນື່ອງຈາກວ່າຕ້ອງໄດ້ລໍຖ້າມາດຕະການເປີດປະເທດຄືນໃໝ່.
ໃນກາງປີ 2021 ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໂດຍການຮ່ວມມືກັບເຄືອຂ່າຍພັດທະນາ, ສົ່ງເສີມ ແລະ ຄຸ້ມຄອງຈຸດໝາຍປາຍທາງທ່ອງທ່ຽວລາວ National Destination Management Network (DMN) ແລະ ການສະໜັບສະໜູນຈາກໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວໃນອະນຸພາກພື້ນແມ່ນ້ຳຂອງ ໄລຍະ 2 ໄດ້ລິເລີ່ມສ້າງແຜນການຕະຫຼາດການທ່ອງທ່ຽວ ຂອງ ສປປ ລາວ ສໍາລັບປີ 2022-2023 ເພື່ອຟື້ນຟູການທ່ອງທ່ຽວຈາກການແຜ່ລະບາດຂອງພະຍາດໂຄວິດ-19 ໂດຍອີງໃສ່ຜົນການສຶກສາ-ວິໄຈ ຕະຫຼາດການທ່ອງທ່ຽວ ຢູ່ພາຍໃນ ແລະ ຕ່າງປະເທດ. ແຜນສະບັບນີ້ສຸມໃສ່ກຳນົດກິດຈະກໍາການທ່ອງທ່ຽວ ໃນຊຸມປີຕໍ່ໜ້າ ແລະ ສັງລວມເອົາການສະໜັບສະໜູນຈາກພາກສ່ວນທີ່ກ່ຽວຂ້ອງ ລວມທັງຜູ້ໃຫ້ທຶນໃນການຈັດຕັ້ງປະຕິບັດແຕ່ລະກິດຈະກໍາການທ່ອງທ່ຽວ.
ເຄືອຂ່າຍພັດທະນາ, ສົ່ງເສີມ ແລະ ຄຸ້ມຄອງຈຸດໝາຍປາຍທາງທ່ອງທ່ຽວລາວ ແມ່ນເວທີໜຶ່ງທີ່ເປັນຊ່ອງທາງສໍາລັບການຮ່ວມມືລະຫວ່າງພາກລັດ ແລະ ຜູ້ປະກອບການທຸລະກິດໃນຂະແໜງການທ່ອງທ່ຽວ. ເຄືອຂ່າຍດັ່ງກ່າວຈະຊ່ວຍຊຸກຍູ້ການຮ່ວມມື, ການປະສານສົມທົບກັບພາກສ່ວນທີ່ກ່ຽວຂ້ອງ ເພື່ອກຳນົດກິດຈະກຳການທ່ອງທ່ຽວ ແລະ ບັນຈຸເຂົ້າໃນແຜນການຈັດຕັ້ງປະຕິບັດຂອງພາກລັດ ແລະ ຜູ້ປະກອບການທຸລະກິດທ່ອງທ່ຽວ. ພ້ອມດຽວກັນນັ້ນ, ຍັງເຮັດໃຫ້ທຸກພາກສ່ວນເຂົ້າໃຈວຽກງານຂອງຂະແໜງທ່ອງທ່ຽວທີ່ກຳລັງຈັດຕັ້ງປະຕິບັດ ແລະ ເພີ່ມທະວີການຮ່ວມມື ເຊິ່ງກັນ ແລະ ກັນໃຫ້ແໜ້ນແຟ້ນກວ່າເກົ່າ.
ບັນດາກິດຈະກໍາດັ່ງກ່າວ, ຈະສຸມໃສ່ໂຄສະນາໃຫ້ນັກທ່ອງທ່ຽວພາຍໃນ, ພາກພື້ນ ແລະ ສາກົນ. ໃນສະພາບປະຈຸບັນການສົ່ງເສີມການທ່ອງທ່ຽວພາຍໃນ ແມ່ນໜຶ່ງໃນນະໂຍບາຍຂອງລັດຖະບານ ເພື່ອກະຕຸ້ນ ແລະ ຟື້ນຟູເສດຖະກິດຂອງ ສປປ ລາວ; ການສືບຕໍ່ໂຄງການ “ລາວທ່ຽວລາວ” ຈຶ່ງເປັນວຽກທີ່ສໍາຄັນ ເພື່ອສ້າງເງື່ອນໄຂຄວາມພ້ອມໃນການເປີດປະເທດ ແລະ ຕ້ອນຮັບນັກທ່ອງທ່ຽວສາກົນໃນຕໍ່ໜ້າ.
ການເປີດປະເທດຄືນໃໝ່, ສປປ ລາວ ຈະຕ້ອງຄໍານຶງເຖິງຈຸດຂາຍທີ່ເປັນເອກະລັກຂອງຕົນ ເພື່ອດຶງດູດນັກທ່ອງທ່ຽວພາກພື້ນ ແລະ ສາກົນໃຫ້ກັບຄືນມາທ່ຽວປະເທດລາວ. ພ້ອມດຽວກັນນີ້, ບັນຫາທີ່ສໍາຄັນຈະຕ້ອງເອົາໃຈໃສ່ການໂຄສະນາການທ່ອງທ່ຽວຕິດພັນກັບບັນດາກິດຈະກໍາການຕະຫຼາດທີ່ໄດ້ກໍານົດໄວ້ໃນແຜນການຕະຫຼາດການທ່ອງທ່ຽວ ຂອງ ສປປ ລາວ ສຳລັບປີ 2022-2023 ເຊັ່ນ: ການໂຄສະນາແບບດີຈີຕອນ, ການໂຄສະນາສື່ສິ່ງພິມ, ການຈັດງານ, ສື່ມວນຊົນ, ປະຊາສໍາພັນ ແລະ ການເຂົ້າຮ່ວມໃນງານວາງສະແດງການທ່ອງທ່ຽວສາກົນທີ່ເປັນຕະຫຼາດທ່ອງທ່ຽວສຳຄັນ ແລະ ເປັນເປົ້າໝາຍຂອງການທ່ອງທ່ຽວລາວ.
